Санаи 12.12.2024 дар Коллеҷи техникии ДТТ номи академик М.Осимӣ, бахшида ба Рӯзи молиячиён ва солҳои 2022-2026 «Солҳои рушди саноат» дар мавзӯи «Ҳисоббаробаркуниҳои ғайринақдӣ ва нақши он дар рушди иқтисодиёти кишвар» конференсияи байналмилалии илмӣ-амалӣ баргузор гардид.
Дар конференсияи мазкур меҳмононон: Хисматуллина Альфия Анваровна – директори коллеҷи академияи байналмилалии тиҷорати шаҳри Алмаатои Ҷумҳурии Қазоқистон, Илесалиев Дауренбек Ихтиярович – доктори илмҳои техникӣ, профессор, ректори Донишгоҳи перфекти шаҳри Ташканти Ҷумҳурии Ӯзбекистон, Соловьева Наталья Валентиновна ва Позднякова Ольга Георгиевна – омӯзгорони Маркази такмили ихтисоси Кузбаси техникуми политехникии Сибири Федератсияи Россия, Быстрова Елена Адольфовна ва Захарова Ирина Генриковна – омӯзгорони коллеҷи технологияҳои саноатӣ, молия ва ҳуқуқи Санкт-Петербурги Федератсияи Россия, Сайисмонов Раҳматшо – н.и.и., дотсенти Донишгоҳи славянии Россия ва Тоҷикистон, Тохтаров Ҷурабек – сардори шуъбаи кор бо мизоҷон, мудирияти амалиёти ҶСП “Активбонк”,
Шодиев Шоҳмуҳаммад Меҳруддинович – лейтинанти Хадамоти гумрук, нозири шуъбаи ташкили назорати гумрукии Раёсатии минтақавии гумрукӣ дар шаҳри Турсунзода иштирок ва суханронӣ намуданд.
Конференсия бо садо додани Суруди миллӣ оғоз гардид. Директори коллеҷи техникии ДТТ ба номи академик М.Осимӣ доктори илмҳои техникӣ, и.в. професссор, Саидзода Масрур Мирзохон ба сухан баромада меҳмонон ва иштирокчиёнро хушомадед гуфта, ба кори конференсия ҳусни оғоз бахшид ва қайд кард, ки дар шароити ҷаҳонишавии муносибатҳои иқтисодӣ яке аз масъалаҳои мубрам ин вусъат додани ҳисоббаробаркунии ғайринақдӣ мебошад. Зеро ҷараёни ҷаҳонишавӣ таъсири амиқи худро дар ин самт гузошта, марҳила ба марҳила гузариш ба ин самтро тақозо менамояд.
Қобили зикр аст, ки зарурати гузариш ба ҳисоббаробаркунии ғайринақдӣ дар мадди назари давлату ҳукумат қарор дошта, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамеша дар паёмҳои худ ба Маҷлиси Олии Ҷумҳурии Тоҷикистон ҷиҳати гузариш ба ҳисоббаробаркунии ғайринақдӣ дастуру супоришҳои мушахас медиҳанд.
Пешвои миллат, муҳтарам Эмомалӣ Раҳмон дар паёми навбатии худ 23 декабри соли 2022 ба масъалаи пурра ҷорӣ кардани ҳисоббаробаркунии ғайринақдӣ таваҷҷуҳи хоса зоҳир карда, таъкид намуданд, ки «…бо мақсади мусоидат ба рушди бахши молиявӣ зарур аст, ки аз 1-уми июли соли 2023 пардохти ҳамаи андозҳо ва боҷҳои давлатӣ барои додани иҷозат ва иҷозатномаҳо, ҷаримаҳо, маблағи суғуртаи ҳатмии давлатӣ, хизматрасониҳои коммуналӣ ва дигар намудҳои хизматрасонии давлатӣ пурра ба таври ғайринақдӣ ба роҳ монда шавад».
Сипас, муовини директор оид ба илм ва инноватсияи коллеҷи техникӣ Азимов Холиқназар ба сухан баромада меҳмонро ба иштирокдорон муаррифӣ намуда, ҳозиринро шодбош гуфта тибқи сенарияи баргузории конференсияи байналмилалӣ ҷиҳати пешбурди кори он шуруъ намуд.
Тибқи сенария, Хисматуллина Альфия Анваровна – директори коллеҷи Академияи байналмилалии тиҷорати шаҳри Алмаатои Ҷумҳурии Қазоқистон ва Илесалиев Дауренбек Ихтиярович – д.и.т., профессор, ректори Донишгоҳи перфекти шаҳри Тошканд Ҷумҳурии Ӯзбекистон тариқи маҷозӣ (онлайн) баромад намуда, иброз доштанд, ки ба роҳ мондани чунин чорабиниҳои сатҳи байналмилалӣ ба густариши ҳамкориҳо дар байни муассисаҳои таълимӣ ва равобити дӯстиву бародарӣ байни миллатҳо сабаб мегардад.
Сипас, Соловьева Наталья Валентиновна ва Позднякова Ольга Георгиевна – омӯзгорони Маркази такмили ихтисоси Кузбаси техникуми политехникии Сибири Федератсияи Россия тариқи маҷозӣ баромад намуда дар мавзӯи «Цифровой рубль – тенденции внедрения в денежный оборот» баромад намуданд.
Инчунин, тариқи маҷозӣ Быстрова Елена Адольфовна ва Захарова Ирина Генриковна – омӯзгорони коллеҷи технологияҳои саноатӣ, молия ва ҳуқуқи Санкт-Петербурги Федератсияи Россия дар мавзӯи “Банковские карты как элемент безналичных расчётов” баромад намуданд.
Сипас, Сайисмонов Раҳматшо – номзади илмҳои иқтисодӣ, дотсенти Донишгоҳи славянии Россия ва Тоҷикистон дар мавзӯи “Рушди низоми бонкӣ ва рақамикунонии бахши молиявӣ” маъруза намуд.
Дар идомаи кори конференсия Тохтаров Ҷурабек сардори шуъбаи кор бо мизоҷон, мудирияти амалиёти ҶСП “Активбонк” баромад намуда, қайд намуд, ки мавзӯи баррасишаванда актуалӣ буда, барои баланд бардоштани дониши молиявии донишҷӯён, магистрантон, унвонҷӯён докторантон, соҳибкорону саноатчиён зарур мебошад.
Қайд гардид ки баъд аз пош хӯрдани Иттиҳоди Шуравӣ низоми ягонаи иқтисодии он кишвар низ аз байн рафт, ки мушкилиҳои зиёди иқтисодиву иҷтимоиро барои Тоҷикистони тозаистиқлол ба бор овард. Чунин мушкилиҳо тамоми соҳаҳои иқтисодии кишвар, хосатан соҳаҳои энергетика, саноат, нақлиёт, кишоварзӣ ва ғайраро фаро гирифт. Баъд аз он, ки дар кишвар сулҳу субот пойдор гардид, дар назди Ҳукумати Тоҷикистон масъалаи таъмини рушди устувори иқтисодии кишвар ба миён омад.
Бо ин мақсад, Ҳукумати Ҷумҳурии Тоҷикистон барои инкишофи босуботи соҳаҳои хоҷагии халқ дар назди худ ҳадафҳои стратегии таъмини рушди босуботи иқтисодиёт, аз ҷумла таъмини истиқлолияти энергетикӣ, раҳоӣ аз бунбасти коммуникатсионӣ, ҳифзи амнияти озуқаворӣ ва саноатикунонии босуръати кишварро муайян намуд.
Баргузор намудани конференсияҳои сатҳи гуногун дар коллеҷи техникии ДТТ ба номи академик М. Осимӣ барои баррасии масъалаҳои мубрами рӯз аз тарафи Раёсати муассиса пайваста ба роҳ монда мешавад.
Конференсияи байналмилалии илмӣ – амалӣ, ки бахшида ба Рӯзи молиячиён ва Солҳои 2022-2026 “Солҳои рушди саноат“ дар мавзӯи “Ҳисоббаробаркуниҳои ғайринақдӣ ва нақши он дар рушди иқтисодиёти кишвар” низ аз қабили чунин чорабиниҳо мебошад.
Дар ҷамъбаст аз ҷониби иштирокчиёни конференсия ба баромадкунандагон дар доираи маърузаҳояшон саволҳо дода шуда, ҷавобҳои қаноатбахш гирифтанд.
Аз баргузории конференсия иштирокчиён рӯҳияи тоза гирифта, қайд намдуанд, ки хуб мешуд чунин чорабиниҳои илмии сатҳи байналмилалӣ бо иштироки олимони ватанию хориҷӣ дар мавзӯъҳои гуногуни иқтисодӣ пайваста ба роҳ монда шавад.
Бахши матбуот
