Ҳизби Халқии Демократии Тоҷикистон 10 декабри соли 1994 дар Анҷумани муассисони Ҳизби Халқии Тоҷикистон ташкил ёфтааст.
Ҳизби Халқии Демократии Тоҷикистон дар асоси Конститутсия, қонунҳои конститутсионӣ, қонунгузории ҷумҳурии Тоҷикистон ва санадҳои байналхалқии ҳуқуқие, ки Ҷумҳурии Тоҷикистон эътироф кардааст, ҳамчунин дар доираи Барнома ва Оинномаи хеш фаъолият мекунад. Ҳизби Халқии Демократии Тоҷикистон ҳамчун ташкилоти ҷамъиятии сиёсӣ бо диду назари нав ба саҳнаи сиёсат омад ва дар мудати начандон тӯлонӣ дар ҷомеа нуфузу ҷойгоҳи арзандаро соҳиб гашта, аз оғози таъсисёбии худ то имрӯз дар пешрафти кишвари азизамон нақши сазовор гузошта истодааст.
Ҳизби Халқии Демократии Тоҷикистон тавонист худро бо ғояҳои созандаву бунёдкорона ва ватандӯстонаву ватанпарварона ба мардум ба таври шоиста муаррифӣ намояд. Имрӯз мардуми шарафманди кишвар ба ғояҳои созандаи Ҳизби Халқии Демократии Тоҷикистон эътимоди қавӣ доранд, зеро он дар сафи пеши созандагию бунёдкорӣ ва ташаббускориҳо қарор дорад, ки барои ваҳдати миллӣ, сулҳу оромӣ, суботи сиёсӣ, созандагиву ободонӣ, рушди устувори иқтисодӣ ва таъмини зиндагии шоистаи мардум равона гардидааст.
Ҳақиқати бебаҳс он аст, ки Ҳизби Халқии Демократии Тоҷикистон маҳсули таффакур ва андешаҳои созандаи Пешвои муаззами миллат муҳтарам Эмомалӣ Раҳмон буда, идеяи таъсиси ҳизби нави сиёсиро маҳз дар ибтидои соли 1993 Роҳбари давлат пешниҳод намуда буданд.
Маҳз рисолати хираду заковати воло ва ояндабинии Пешвои муаззами миллат буд, ки барои ташкили Ҳизби Халқии Демократии Тоҷикистон бо қатъияту ҷасорат иқдом намоянд ва инак, бо гузашти 30- сол ҳизб ҳамчун ниҳоди тавонои сиёсӣ дар мамлакат тавассути сиёсати бунёдкорона ва татбиқи собитқадамонаи ҳадафҳои оинномавӣ ва барномавии худ, бо такя ба масъулиятшиносию иқтидори зеҳнии аъзо ва ҷонибдоронаш омили таҳкимбахши раванди созандагиву бунёдкории ҷомеаи Тоҷикистони соҳибистиқлол гардидааст.
Ҳизби Халқии Демократии Тоҷикистон зодаи Истиқлолияти кишвар буда, аз умқи дили таффакури мардум реша мегирад. Он аз рӯзи аввали таъсис ҳимояи манфиатҳои халқро ҳадафи асосии худ қарор дода, барои зиндагии босаодати миллат ва ободии Ватан зери шиори «Барои ваҳдат, рушди устувори иқтисодӣ ва зиндагии шоистаи мардум» саъю талош меварзад. Имрӯз, бешубҳа, онро метавон ягона неруи сиёсии кишвар номид, ки дар заминаи ғояҳои созандаву ваҳдатофари миллӣ ба майдони сиёсат ворид гардида, борҳо ин афзалияти хешро собит намудааст.
Воқеан Ҳизби Халқии Демократии Тоҷикистон тараннумгари дастовардҳои навини мамлакат буда,дар амалисозии ҳадафҳои созандаи давлату Ҳукумат бо риояи қонунҳои Оиннома ва Барномаи ҳизб ва дар ин радиф дар ҳамбастагӣ бо сохторҳои дахлдор барои ҳалли мушкилию муаммоҳо фаъолияти судманд менамояд. Месазад иброз намоем, ки Тоҷикистони мо таҳти сарварии Пешвои миллат муҳтарам Эмомалӣ Раҳмон ба сӯи эъмори давлати демократӣ, ҳуқуқбунёд ва дунявӣ дилпурона пеш меравад ва дар ҷодаи бунёдкорию созандагӣ қадамҳои устувор мегузорад. Сулҳу субот, ваҳдати миллӣ, сарҷамъию ҳамдигарфаҳмӣ дар ҷомеа рӯз ба рӯз густариш ёфта, бо шарофати ин раванди нек сатҳи зиндагии мардум торафт баланд мегардад. Воқеан, озодию ҳамдилии мо ҳамон вақт маънию моҳияти ҳақиқӣ пайдо мекунад, ки ҳар фарди ҷомеа онро ба хубӣ дарк намояд. Ин аст, ки Ҳизби Халқии Демократии Тоҷикистон бо назардошти вазъи ҳассосу мураккаби ҷаҳони имрӯза амал карда, ҳамчун неруи пешбари ҷомеа мардумро ба ободонию созандагии Ватан, ҳушёрию зиракии сиёсӣ ва ҳифзу таҳкими бузургтарин дастовардҳои таърихи навини халқамон – истиқлолияти давлатӣ ва ваҳдати миллӣ роҳнамоӣ менамоянд.
Саидзода Масрур Мирзохон – директори коллеҷи техникиии ДТТ ба номи академик М.Осимӣ
