Андоз пардохти ҳатмии муқаррарнамудаи Кодекси андози Ҷумҳурии Тоҷикистон ба буҷет мебошад, ки ба андозаи муайян амалӣ гардида, хусусияти ҳатмии бебозгашт ва беподош дорад. Бинобар ин, татбиқи сиёсати дурусти андозӣ дар Ҷумҳурии Тоҷикистон омили рушди соҳаҳои иҷтимоию иқтисодӣ гардида, ба пайдо шудани ҷойҳои нави корӣ, рушди истеҳсолот, баланд бардоштани сатҳи зиндагии аҳолӣ ва дар маҷмуъ рушди ҳамаҷонибаи давлат мегардад. Дар Ҷумҳурии Тоҷикистон такмил ёфтани низоми андоз дар мадди назари давлату Ҳукумат қарор дошта, сол то сол ба меъёрҳои замони муосир мутобиқ гардонида мешавад. Мисоли гуфтаҳои боло Кодекси андози Ҷумҳурии Тоҷикистон дар таҳрири нав мебошад, ки соли 2022 қабул гардид. Дар кодекси мазкур имтиёзҳо барои соҳаҳои алоҳидаи хоҷагии халқ, шахсони воқеӣ ва ҳуқуқӣ пешбинӣ гардидааст, ки тасдиқи гуфтаҳои боло мебошад.
Барои баррасии низоми андози Ҷумҳурии Тоҷикистон ва мавриди омӯзиш қарор додани он санаи 06.12.2024 аз тарафи омӯзгорони кафедраи молия ва ҳисобдорӣ Бобоев Ҳусейн ва Ҳамидова Сайёра дар факултети муҳандисию иқтисодии Коллеҷи техникии ДТТ ба номи академик М. Осимӣ дар мавзӯи «Низоми андози Ҷумҳурии Тоҷикистон» бо иштироки кормандони шуъбаи илм ва инноватсия, раёсати ташкилӣ – тарбиявӣ, садорати факултети муҳандисию иқтисодӣ, мудири кафедраи молия ва ҳисобдорӣ ва омӯзгорону донишҷӯёни фаъоли факултети муҳандисию иқтисодӣ маҳфили илмӣ гузаронида шуд.
