Санаи 03.10.2024 дар толори фарҳнгии коллеҷи техникии ДТТ ба номи академик М.Осимӣ чорабинии фарҳангӣ-фароғатӣ бахшида ба “Рӯзи омӯзгорон” таҳти унвони “Кист медони муаллим он, ки нозад сарварӣ” баргузор гардид.
Дар чорабинии мазкур Ҳуринисо Ализода – раиси шурои воситаҳои ахбори оммаи Тоҷикистон, Равшани Ҳамроҳ – номзади илмҳои филологӣ, дорандаи ҷоизаи ба номи Лоиқ Шералӣ, узви Иттифоқи нависандагони Тоҷикистон, аҳли раёсат ва омӯзгорону донишҷӯёни коллеҷи техникӣ иштирок намуданд.
Сароғоз, директори коллеҷи техникӣ доктори илмҳои техникӣ и.в. профессор Саидзода Масрур Мирзохон ба сухан баромада меҳмонро муаррифӣ, чорабиниро кушода эълон кард ва ҳамаи омӯзгоронро бо иди касбиашон табрик гуфта, ба корҳои илмиашон бурдбориҳоро таманно намуд.
Зимни баромади хеш муҳтарам Саидзода М.М. қайд намуд, ки чуноне, ки ҳамагон медонем, ҳамасола ҳафтаи аввали моҳи октябр Иди касбии омӯзгорон дар саросари ҷумҳурии азизамон ҷашн гирифта мешавад. Бузургии шахсият ва омӯзгор аз забони бурро, шево, фаҳмо муайян карда мешавад.
Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қайд менамоянд: “Омӯзгорӣ муқаддастарин пешаи рӯи олам аст. Бедории фикр, покизагии ахлоқ аз маҳсули ранҷу машаққати шабонарӯзии омӯзгор вобаста аст”.
Шоирону нависандагони тоҷик дар васф ва манзалати омӯзгор шеъру суханҳои зиёд гуфтаанд.
Асосгузори адабиёти форсу тоҷик, устод Абӯабдуллоҳи Рӯдакӣ мақом ва манзалати омӯзгорро дар ҷомеа чароғи маърифат, нуру эҳёи миллат дониста, бе хизмати ӯ аз бехирадон тира шудани рӯзгорро ҳушдор додаст:
Агар дар ҷаҳон набвад омӯзгор,
Шавад тира аз бехирад рӯзгор.
Омӯзгор машъалафрӯзи ҷомеа ба ҳисоб рафта, ба зиммаи ӯ масъулияти басо бузург ва пуршараф – таълиму тарбияи насли наврас вогузор карда шудааст. Мо омӯзгоронро зарур аст, ки дар руҳияи содиқ будан ба анъанаҳои неки гузаштагони хеш, донистани забону таърихи пурғановати миллати худ, дар руҳияи ватандӯстию инсондӯстӣ талош варзем.
Сипас, раиси шурои воситаҳои ахбори оммаи Тоҷикистон Ҳуринисо Ализода ва Равшани Ҳамроҳ – номзади илмҳои филологӣ, дорандаи ҷоизаи ба номи Лоиқ Шералӣ, узви Иттифоқи нависандагони Тоҷикистон ба сухан баромада, омӯзгоронро бо иди касбиашон табрику шодбош намуда, қайд намуданд, ки дар воқеъ саҳми устод-омӯзгор дар тарбияи насли наврас, тайёр намудани мутахассисони соҳаҳои мухталиф ва бо роҳи рост ҳидоят намудану омӯзонидани дарси зиндагӣ назаррас мебошад. Баромадкунандагон қайд намуданд, ки рушд ва ояндаи ягон ҷомеаро бе заҳмати омӯзгор наметавон тасаввур кард. Зеро омӯзгор дар тарбияи насли ояндасоз ва мутахассисони баландихтисос нақши арзанда дорад. Хушбахтона, бо ибтикори Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон омӯзгор дар ҷомеа мавқеи муҳимро касб кард ва тавре иброз медоранд: «Калиди ҳама гуна дастоварду пешравӣ ва истиқлолияти фикрӣ муаллим – омӯзгор ва хазинаи маънавию илмии ӯ ба шумор меравад».
Дар ҷараёни баргузориии чорабинии мазкур донишҷӯёни коллеҷи техникӣ порчаҳои назмиву насрӣ қироат намуданд, ки тараннумгари хизматҳои шоён ва заҳмату меҳнати назарраси омӯзгорон мебошад.
Дар фарҷоми чорабинӣ бахшида ба Рӯзи омӯзгорон барномаи фарҳангию фароғатии бахши фарҳанги коллеҷи техникӣ табъи ҳозиринро болида намуд.
